8M. Emakumeen Nazioarteko Egunaren ospakizuna
Aurten ere, Gizakia Fundaziotik bat egin dugu Emakumeen Nazioarteko Egunarekin, berdintasunezko gizarte bat aldarrikatzeko, non emakumeek eta gizonek aukera berdinak izango ditugun esparru guztietan.
Argi daukagu zein erronkari egin behar diogun aurre berdintasun eraginkorra lortzeko; besteak beste, pobreziaren feminizazioa eta emakumeen aurkako indarkeria nabarmentzen ditugu.
Martxoaren 8an, Gizakia Fundazioaren erabiltzaile diren emakumeengan jarri nahi dugu arreta, bai eta bizi proiektuak berdintasun-baldintzetan garatzea oztopatzen duten kalteberatasun-faktore ugariengan ere. Badakigu artatzen ditugun emakumeen ehuneko handi batek genero-indarkeria fisiko, psikologiko eta sexualeko egoerak izan dituela bizitzan zehar, edo gaur egun ere harreman toxikoak dituztela; gainera, emakume askok ez dute gizarte-laguntzako sarerik, eta langabezian daude. Aurretiko lan-esperientzia eskasak eta ikasketa-maila baxuak askotan enplegu oso prekarizatuetara edo langabezia kronikora bultzatzen ditu. Gainera, oraindik ere mendekotasunarekin batera datorren estigma are handiagoa da emakumea denean, eta egoera hori larriagotu egiten da emakume migratzaileen, dibertsitate funtzionala dutenen edo guraso bakarreko familien kasuan.
Errealitate horren aurrean, gaur martxoaren 8an eta urteko egun guztietan benetako berdintasunean lan egiten eta aurrera egiten jarraitzeko konpromisoa hartzen dugu. Eta horretarako, gure erakundean aste osoan zehar hainbat sentsibilizazio-ekintza egin ditugu, eta gaur goizean amaitu ditugu, kontsumo aretoan berdintasunezko hamaiketakoa eginez, gure Komunitate Terapeutikoan manifestu bat irakurriz eta Bilboko arreta-zentroetako erabiltzaile eta profesionalek parte hartuz, Emakumeok Bidean Elkarteak Bilboko Arriaga antzokiaren aurrean 12: 00etan antolatutako elkarretaratzean.
Aste osoan erakundeak egun dituen zentroetako bakoitzean egin diren ekintzetako batzuk aipatu nahi ditugu:
- Emakumeen eta gizonen berdintasunaren gaia talde terapeutikoetan eta hezkuntza-taldeetan sartzea, baita Fundazioaren programa guztien tailerretan ere.
- Emakumeen taldeen nazioarteko egunari buruzko monografikoa.
- Gizakia Fundazioak Bilbon (Abando, Deustu eta San Inazio) eta Gordexolan dituen zentroen apainketa.
- Berdintasunean sentsibilizatzeko bideoen eta irudien proiekzioa Bilboko ikastetxeetan.
- Zineforuma egitea, erakundeko erabiltzaileekin, Laneratzean eta Komunitate Terapeutikoan "Las Sufragistas" eta "Figuras Ocultas" filmekin.
